नेपालगन्जमा फैलिएको झाडापखालाले प्रकोपको रुप लिएपछि हैजाको आशंकामा परिक्षणको लागि विशेषज्ञसहितको स्वाथ्यकर्मीको टोली आज त्यसतर्फ जाँदैछ । संक्रमण बढेपछि स्वास्थ्य मन्त्रालयको इपिडिमियोलोजी तथा रोग नियन्त्रण महाशाखाको एक उच्च स्तरीय टोली १० बजेतिर नेपालगञ्ज जाने कार्यक्रम छ । नेपालगन्जका डुबानग्रस्त क्षेत्रमा सर्वसाधारणहरु पखाला लागेको केही मिनेटमै बेहोस हुने र नाडी नचल्ने गरि सिकिस्त हुन थालेपछि हैजा फैलिएको आशंका गरिएको छ । झाडापखालाबाट हिजो ३ जनाको मृत्यु भएको थियो । यस्तै अहिले दाङका विभिन्न स्थानमा गरी करीव २० जना भन्दा वढि झाडा पखालाका विरामीहरु रहेको जिल्ला जनस्वास्थ्य कार्यालय दाङले जनाएको छ । यसैबीच, नेपालगन्ज नगर क्षेत्रमा फैलिएको झाडापखालाको संक्रमणबाट प्रभावित हुनेको संख्या बढ्दै गएको छ । झाडापखालाबाट प्रभावित भै उपचारका लागि अस्पताल आउनेहरुको आइरो लागेको छ । आज विहानसम्म झाडापखाला फैलने क्रम बढ्दो क्रममा रहेको जनस्वास्थ्य कार्यालयका फोकल पर्सन रामबहादर चन्दले जानकारी दिनु भयो । उहाँका अनुसार, उपचार गराउन आउनेहरुको संख्या आज विहानसम्म भेरी अञ्चल अस्पतालमा ५६ तथा नेपालगन्ज शिक्षण अस्पतालमा दुई सयबढी पुगेको छ । विरामी मध्ये ४० बढीको अवस्था गम्भीर छ । झाडापखालाबाट हिजो बाँकेमा तीन जनाको ज्यान गै सकेको छ ।