सदरमुकाम वेसीशहरदेखि तनहुँको डुम्रे सम्मको सडक खण्ड अबरुद्ध भएकोमा अहिले संचालनमा आईसकेको छ ।  मकवानपुर घर भई लु १ ख ४७५४ नम्बरको वसमा सहयोगीको काम गर्दै आएका सञ्जय सुवेदीलाई गएराती दनाईफाँटमा सुनिल दनाई र अर्को एकजना नाम नखुलेको युवकले कुटपिट गरेका थिए । आफ्ना कर्मचारीलाई कुटपिट गरेको विषयलाई लिएर यातायात मजदुरहरुले आज विहानै देखि डुम्रे–वेसीशहर सडक खण्ड बन्द गराएका थिए । बन्द कर्ता मजदुरहरुसंग प्रहरीले गरेको छलफलमा दोषीलाई कारवाही गर्ने र घाईतेको उपचार खर्च जुटाउने विषयमा सहमती भएपछि यातायात सेवा सुचारु भएको हो ।  यातायात मजदुरहरुको अवरोधका कारण काठमाडौँ, पोखरा, चितवन लगायत लामो तथा छोटो दुरीका सवारी साधन चल्न नसकेपछि गन्तब्यमा हिँडेका यात्रुहरु अलपत्र परेका थिए । कुटपिटपछि गम्भीर घाईते सुवेदीको लमजुङ जिल्ला सामुदायिक अस्पतालमा उपचार भईरहेको छ । कुटपिटमा संलग्न हुनेहरुको खोजी भईरहेको प्रहरीले जनाएको छ ।